YB – Ä LIDESCHAFT FÜR AUI!
Da s’scho syt längerer Zyt e Wartelischte für Saisonabos im Sektor D besteit u s’drzue o immer wider YB-Fans gyt, wosech es Ticket fürnes Heimspiu schlicht nid chöi leischte, biete mir aus Ostkurve Bern e sicheri Müglechkeit für d’Wytergab vo Saisonabos im Sektor D.
Zum üs es Ticket zur Verfüegig z’steue, womer aschliessend a suechendi YB-Fans dörfe wytergä, chasch du dis Match-Ticket us dr «YB-Tickets» App generiere u s’üs bis drü Tag vorem jewilige Heimspiu per Mail a mitglieder@ostkurve.be zueschicke. YB-Fans, wo ihres physische Saisonabo möchte zur Verfüegig steue, dörfesech säubverständlech äbefäus via Mail mäude.
Unger däm Link chasch du di fürne ganzi Saison i Verteiler für ds Infomail itrage. Sobaud du im Verteiler ufgfüehrt bisch, wirsch du vor jedem Heimspiu (ir Regu zwöi Tag vorem jewilige Spiu, vorusgsetzt es gyt verfüegbari Tickets) e Nachricht becho. Im Aschluss hesch du d’Müglechkeit, mitere entsprächende Antwort, a eis vo dene Tickets z’cho. Hie giut: «Dr Ender isch dr Gschwinder».
Faus du wyter o für d’Uswärtsspiu e Müglechkeit suechsch, wie du eifach u unkompliziert anes Ticket füre Gästeblock chasch cho, empfähle mir dir d’Mitgliedschaft vor Ostkurve Bern. Die chasch du a jedem Heimspiu am Mitglieder-Stand ir Ostkurve für jewius e ganzi Saison löse.
A dere Steu möchte mir di animiere, d’Abo-Börse z’bruche – Teil dini Fröid a Gäubschwarz mit angere YB-Fans, wo während dire Abwäseheit ihre Schau mit Stouz i d’Höchi häbe!