Da s’scho syt längerer Zyt e Wartelischte für Saisonabos ir Ostkurve gyt und dr Block generell bi de meiste Heimspiu usverchouft isch, möchte mir aus Ostkurve Bern e Müglechkeit und Plattform für d’Wytergab vo Sasionabos im Sektor D biete. Mir möchte dir aus Abo-Bsitzer*in d’Müglechkeit gä, dass du dis Abo gratis amne YB-Fan zu Verfüegig chasch steue, wo entweder säuber no nid anes Abo isch cho oder evtl. o ufgrund vor finanzielle Situation nid ir Lag isch, sich es Ticket, geschwige de es Abo, z’choufe.
Um üs es Ticket zur Verfüegig z’steue, so dass mir das när de jewilige Persone chöi wytergä, muesch du ds Ticket digital us dim YB Ticketing-App generiere und üs im Aschluss drü Tag vorem jewilige Heimspiu per Mail a mitglieder@ostkurve.be schicke. Ds Ticket chasch du üs im App via Button „Ticket weiterleiten“ mit dr aschliessende Agab vor obä erwähnte E-Mailadrässe ganz eifach wyterleite.
D’Übergab wird im Aschluss diräkt dür üs greglet und findet jewius 15 Minute vor Stadionöffnig ufem Quartierplatz vorem Stadion statt. Üs isch wichtig z’betone, dass du aus abietendi Person ehrlech mit däm Ticket umgeisch und ufe Matchbsuech verzichtisch, sobaud du üs dis Abo zur Verfüegig steusch.Mir wei unbedingt vermide, dass mir d’Vorfröid ufene Bsuech vomnä YB-Match müesse kaputt mache, wüu ds Ticket scho isch verwändet worde. Usserdäm wei mir erwähne, dass ke Profit us däm Projekt gschlage wird, getröi nachem Motto: «YB – ä Lideschaft für aui».
A dere Steu möchte mir di animiere, vo dr Abo-Börse Gebruch z’mache. Teil dini Fröid a YB mitere angere Person, wo während dire Abwäseheit dr Schau mit Stouz id Höchi wird häbe.
Unger däm Link chöit dir öich jewius fürne ganzi Saison i Verteiler für d’Infomails itrage. Sobaud dir im Verteiler ufgfüehrt syt, wärdet dir vor de Heimspiu (ir Regu zwöi Tag vorem jewilige Spiu) es Mail mit dr Azau a verfüegbare Tickets becho, insofern mir Abos zur Verfüegig gsteut hei becho. Im Aschluss heit dir d’Müglechkeit, via Rückmäudig, a eis vo dene Tickets z’cho. Hie giut «dr Ender isch dr Gschwinder». Faus du o für d’Uswärtsspiu ä Müglechkeit suechsch, wie du eifach und unkompliziert anes Ticket füre Gästeblock chasch cho, empfähle mir dir d’Mitgliedschaft vor Ostkurve Bern. Die chasch du a jedem Heimspiu am Ticketing-Stand ir Ostkurve für jewius e ganzi Saison löse. Wyteri Infos disbezüglech erhautisch du diräkt bi üs am Mitglieder-Stand.